Tá tú anseo:   Baile > Nuacht agus Imeachtaí > Preaseisiúintí

Le heisiúint: 11am, Déardaoin, 26 Aibreán 2007

TAISPEÁNANN TAIGHDE NUA GO LAGHDAÍONN CÓIREÁIL MHEATADÓIN AN ÚSÁID DRUGAÍ AGUS RANNPHÁIRTEACHAS SA CHOIREACHT 

Taispeánann taighde nua a foilsíodh inniu (Déardaoin, 26 Aibreán) go ndéanann rannpháirteachas leanúnach i gclár meatadóin úsáid drugaí duine agus a rannpháirteachas sa choireacht éadála a laghdú go substaintiúil. Dr Catherine Comiskey agus Ollscoil na hÉireann, Má Nuad, a rinne an taighde, a foilsíodh in ROSIE (Research Outcome Study in Ireland Evaluating drug treatment effectiveness) Findings 4 agus choimisiúnaigh an Coiste Comhairleach Náisiúnta ar Dhrugaí (CCND) an taighde in 2002 mar chuid de Ghníomh 99 den Straitéis Náisiúnta Drugaí

Agus é ag labhairt ag an seoladh, dúirt Noel Ahern T.D., Aire Stáit le freagracht as an Straitéis Náisiúnta Drugaí gur: “Léiriú soiléir is ea na torthaí seo go mbíonn eilimintí cóireála na Straitéise Náisiúnta Drugaí éifeachtach agus go dtagann laghduithe substaintiúla ar an úsáid drugaí dá mbarr. Taispeánann na torthaí go bhfuil ag éirí le hiarrachtaí le daoine a choinneáil i mbun cóireála, gan ach 12% tar éis imeacht ón gcóireáil tar éis bliain amháin." (lean 79% ar aghaidh i mbun na cóireála meatadóin, chuir 3% an chóireáil i gcrích, d'aistrigh 6% chuig cóireálacha eile agus d’imigh 12% ón gcóireáil). 

Lean an tAire Ahern ar aghaidh "Is mór an t-údar misnigh na laghduithe substaintiúla i gcaitheamh  drugaí,  go háirithe an méid hearóine a chaitear, in éineacht leis an laghdú substaintiúil a tuairiscíodh ar an rannpháirteachas sa choireacht acu siúd atá i mbun na cóireála meatadóin. Tá faoin Rialtas cur leis na torthaí dearfacha seo trí fhócas níos mó ar athshlánúchán a leanfaidh l ar aghaidh,  faoi mar a leagadh amach i dTuarascáil na Meithle um Athshlánúchán ó Dhrugaí, a fhoilseofar go luath."

Tugann ROSIE Findings 4 le fios gur thaispeáin rannpháirtithe i gcláir chóireála meatadóin laghdú ar úsáid spriocdhrugaí buntábhachtacha amhail hearóin, cóicín, meatadóin nach bhfuarthas ar oideas agus beinsidé-asaipíní – le laghdú i gcaitheamh  hearóine  ó 84% tráth a glacadh daoine isteach i gclár cóireála go dtí 53% tar éis bliain amháin. Bhí laghdú ann freisin ar chéatadán na rannpháirtithe a thuairiscigh go raibh siad rannpháirteach sa choireacht éadála, ó 28% % tráth a glacadh daoine isteach i gclár cóireála go dtí 15% tar éis bliana amháin. Tá rannpháirtithe a thuairiscigh gadaíocht, earraí goidte a láimhseáil agus sireadh san áireamh leis seo.

Agus é ag caint faoin bhfíric go raibh 79% de rannpháirtithe bunaidh an staidéir fós i mbun  cóireála ag  céim leanta ar aghaidh aon bhliana,  dúirt Dr Des Corrigan, Cathaoirleach an CCND, go bhfuil na rátaí coinneála sa staidéar seo níos airde ná i staidéir inchomparáide.

“Mar shampla sa Ríocht Aontaithe, coinníodh díreach os cionn 50% de dhaoine i gcóireáil mheatadóin tar éis bliain amháin, agus san Astrail ní raibh ach 44% fós cláraithe i gcláir mheatadóin  céim leanta ar aghaidh aon bhliana.  Is é ár ndearcadh gurb é an fachtóir criticiúil a bhíonn i gceist leis na rátaí coinneála arda seo a bhaint amach ná go mbíonn seirbhísí in Éirinn ar fáil go háitiúil."

I measc torthaí buntábhachtacha eile ó ROSIE 4 bhí:

• Chonacthas laghdú ar líon na rannpháirtithe a thuairiscigh go raibh siad ag instealladh drugaí agus   ar mhinicíocht na húsáide drugaí trína n-instealladh tar éis bliain amháin; 
• Bhí iompar riosca  a bhain le drugaí a bheith á n-instealladh  tráth a glacadh daoine isteach i gclár cóireála  íseal agus d’fhan sin socair i gcaitheamh na tréimhse ama a bhfuiltear ag tuairisciú faoi;
• D’fhan airíonna sláinte fisiciúla agus meabhrach na rannpháirtithe mórán mar an gcéanna tar éis na chéad bhliana den chóireáil mheatadóin.

Le haghaidh tuilleadh faisnéise, téigh i dteagmháil le Pat Montague (087 2549123)/ Dave Gibney (087 7992480) ag Montague Communications, teil. 01 8303116.

Nótaí don Eagarthóir:

• Tá freagracht ar an Aire Stáit as an Straitéis Náisiúnta Drugaí agus as Gnóthaí Pobail ag an Roinn Gnóthaí Pobail, Tuaithe agus Gaeltachta agus as Tithíocht agus Athnuachan Uirbeach ag an Roinn Comhshaoil, Oidhreachta agus Rialtais Áitiúil.
  
  
• Choimisiúnaigh an CCND an taighde seo in 2002 agus tar éis tairiscinte oscailte, bronnadh an conradh ar Dr Catherine Comiskey agus OÉ Má Nuad. 
  
  
• Comhlíonann an staidéar seo freagracht an CCND i ndáil le Gníomh 99 de Straitéis Náisiúnta Drugaí 2001-2008: “Staidéir bhreise ar thorthaí a choimisiúnú laistigh de shuíomh na hÉireann chun tionchar reatha na cóireála meatadóin, ar  shláinte an duine aonair agus ar iompar a sháraíonn an dlí araon, a dhéanamh amach. Ba chóir go mbeadh staidéir den sórt sin ina n-uirlis thábhachtach agus luach fadtéarmach na cóireála seo á dhéanamh amach.’
  
• Cuireadh tús le hobair allamuigh don staidéar le hearcaíocht i Márta 2003 agus chuathas ar aghaidh leis na huirlisí taighde a thástáil ar bhonn píolótach. Lean an earcaíocht iomlán ar aghaidh ó Mheán Fómhair 2003 go dtí Iúil 2004. Earcaíodh 404 úsáideoir codlaidíneach do Staidéar ROSIE agus iad ag dul isteach i gcóireálacha lenar bhain trí innéacs; cothabháil/laghdú meatadóin (53.2%, u=215) díthocsainiúchán struchtúrtha (20%, u=81) agus cóireáil bunaithe ar an staonadh (20.3%, u=82). Lena chois seo, earcaíodh foshampla d’úsáideoirí codlaidíneach ó sheirbhísí malartaithe snáthaidí (6.4%, u=26). Bhí na modúlachtaí seo ina gcuid d’fhaisnéisiú na tairisceana ón gCCND toisc gur measadh gurbh ionann iad agus na hidirghabhálacha is fairsinge a chuirtear i ngníomh d’úsáideoirí codlaidíneach in Éirinn. 

Modheolaíocht an Taighde:
Is í  an mhodheolaíocht a  úsáideadh ná  staidéar ionchasach fadaimseartha breathnadóireachta. Cuireadh agallamh ar rannpháirtithe ag an trí thréimhse ama agus úsáid á baint as sceideal agallaimh réamhullmhaithe, lenar scrúdaíodh tomhaiseanna buntábhachtacha maidir le torthaí lena n-áirítear:

• Úsáid drugaí  (lena n-áirítear cineál an druga, minicíocht  agus méid na húsáide);
• Sláinte Ghinearálta (measúnacht 10 bpointe ar shláinte fhisiciúil & shíceolaíochta);
• Feidhmiú sa tSochaí (fostaíocht, cóiríocht, rannpháirteachas i gcoireacht);
• Díobháil ( iompar insteallta  & taithí ar ródháileoga) agus;
• Mortlaíocht (aiseolas ó rannpháirtithe/theagmhálacha & ag seiceáil rannpháirtithe nár leanadh i gcoinne Chlár Ginearálta na mBásanna).

Tagraíonn an choireacht éadála do gach cineál gadaíochta, calaois agus d’earraí goidte a bheith á láimhseáil agus ní bhíonn díol/soláthar drugaí nó sireadh san áireamh leis.

Baile | Teagmhálacha | Mapa suímh | Cuardach | Faoin gCCND | Nuacht agus Imeachtaí | Foilseacháin | Gníomhaíochtaí Taighde| Clár Oibre | Maoiniú Taighde | Naisc