Tá tú anseo:   Baile > Nuacht agus Imeachtaí > Preaseisiúintí

LÉIRÍONN TUARASCÁIL NUA GUR BEAG AN MÉADÚ A THÁINIG AR LÍON NA nDRUGAÍ MÍDHLEATHACHA A ÚSÁIDEADH LE DÉANAÍ AGUS ATÁ Á nÚSÁID FAOI LÁTHAIR IN ÉIRINN Ó 2002/2003

Le heisiúint: 9.30am, Dé hAoine, 25 Eanáir 2008

Suirbhé ar Leitheadúlacht Drugaí 2006/7

LÉIRÍONN TUARASCÁIL NUA GUR BEAG AN MÉADÚ A THÁINIG AR LÍON NA nDRUGAÍ MÍDHLEATHACHA A ÚSÁIDEADH LE DÉANAÍ AGUS ATÁ Á nÚSÁID FAOI LÁTHAIR IN ÉIRINN Ó 2002/2003

Tá méadú tagtha ar líon na ndaoine a thuairiscíonn gur úsáid siad aon druga mídhleathach ar bith riamh (leitheadúlacht ar bhonn saoil) in Éirinn ó 18.5% den daonra in 2002/3 go 24% in 2006/7. Ní raibh aon mhéadú inchomparáide ann áfach ar líon na ndaoine a d'úsáid drugaí le déanaí (le bliain anuas) agus/nó atá á n-úsáid faoi láthair (le mí anuas) de réir tuarascála nua a d’fhoilsigh an Coiste Comhairleach Náisiúnta ar Dhrugaí (CCND) inniu (Dé hAoine, 25 Eanáir). Tá an fhaisnéis seo i mBullaitín 1 de Úsáid Drugaí in Éirinn agus i dTuaisceart Éireann: Na Chéad Torthaí ó Shuirbhé 2006/2007 ar Leitheadúlacht Drugaí a sheol an tUasal Pat Carey, T.D., Aire Stáit a bhfuil freagracht air as an Straitéis Náisiúnta Drugaí.

Is é seo an dara Suirbhé ar Leitheadúlacht Drugaí, tar éis an chinn a choimisiúnaigh an CCND agus an tAonad um Thaighde agus Fhaisnéis ar Dhrugaí agus Alcól (ATFDA) i dTuaisceart Éireann in 2002/3. Is é príomhfhócas na suirbhéanna seo ná rátaí leitheadúlachta a fháil do dhrugaí mídhleathacha buntábhachtacha, amhail cannabas, eacstais, cócaon  agus hearóin, ar bhonn saoil, le bliain anuas agus le mí anuas.

Ag labhairt dó agus an tuarascáil á seoladh, dúirt an tAire Carey, “Cé gurb é cannabas an druga mídhleathach is coitianta a úsáidtear fós, tá méadú tagtha ar líon na ndaoine a úsáideann cócaon , go háirithe i measc dhaonra na ndaoine fásta óga (15-34). Tá an toradh seo ar aon dul le comhthuarascáil leis an gCCND/Foireann na Straitéise Náisiúnta Drugaí (FSND) ar chócaon  (Forléargas ar Úsáid an Chócaoin  in Éirinn II) a foilsíodh anuraidh, agus ar aon dul le taithí na ndaoine atá ag obair sa réimse agus leis an méid a rabhthas ag súil leis go ginearálta. Tá moltaí na tuarascála a tháinig amach níos luaithe á dtabhairt ar aghaidh againn cheana féin ar bhealach diongbháilte comhordaithe. Ar an iomlán, dearbhaíonn an suirbhé seo an gá le fócas spriocdhírithe ar chosc na húsáide drugaí agus tá a thorthaí tráthúil maidir leis an obair a tosaíodh leis an Straitéis Náisiúnta nua Drugaí a fhorbairt chun an tréimhse 2009-16 a chlúdach.  
Chuir an tAire Carey leis sin á rá “ Déanfar  tuilleadh anailíse ar na sonraí agus cuirfear iad i láthair ar leibhéal an Tascfhórsa Réigiúnaigh ar Dhrugaí agus foilseofar bullaitíní mionsonraithe ar  úsáid channabais agus chócaoin  araon, lena n-áirítear faisnéis maidir le dearcaí, níos déanaí i mbliana”. 

Torthaí :
Agus na torthaí á gcur i láthair aici, dúirt Máiréad Lyons, Stiúrthóir ag an gCCND:

• “gur úsáid beagnach duine as gach ceathrar (24%) druga mídhleathach uair amháin ar a laghad ina saol in Éirinn;
• gur úsáid duine as gach ceathrar déag (7%) druga mídhleathach le bliain anuas in Éirinn agus
• gur úsáid duine as gach 30 (3%) druga mídhleathach le mí anuas in Éirinn”.

Faoi  mar a bheifí  ag súil leis, chonacthas méaduithe ar an úsáid ar bhonn saoil ó rinneadh an suirbhé roimhe seo, trasna raon  drugaí mídhleathacha lena n-áirítear:

Úsáid ar Bhonn Saoil

• Aon druga mídhleathach - aníos ó 18.5% in 2002/3 go 24% in 2006/7
• Cannabas - aníos ó 17.4% in 2002/3 go 21.9% in 2006/7;
• Beacáin draíochta - aníos ó 3.9% in 2002/3 go 5.8% in 2006/7;
• Eacstais - aníos ó 3.7% in 2002/3 go 5.4% in 2006/7;
• Cócaon - aníos ó 2.9% in 2002/3 go 5% in 2006/7.

Úsáid le bliain anuas (athruithe atá suntasach ó thaobh na staitisticí)

• Aon drugaí mídhleathacha (aois 15-64):
  aníos ó 5.6% in 2002/3 go 7.2% in 2006/7;
  
  
• Aon drugaí mídhleathacha (aois 25-34):
  aníos ó 6.6% in 2002/3 go 9.2% in 2006/7;
  
  
• Aon drugaí mídhleathacha (mná):
  aníos ó 3.4% in 2002/3 go 4.7% in 2006/7.

Ag caint dó faoi na torthaí, dúirt Dr. Des Corrigan, Cathaoirleach an CCND, nár úsáid formhór na ndaoine ina Éirinn druga aindleathach riamh. Mhínigh Dr. Corrigan go bhfuil na figiúirí íseal fós i ndáil leis an úsáid reatha (úsáid le mí anuas), agus gur beag athrú a taispeánadh ó 2002/3 – go deimhin tháinig laghdú beag ar líon na ndaoine, a thuairiscigh gur úsáid siad aon druga mídhleathach ar bith le mí anuas, ó 3% go 2.9%, i gcaitheamh na tréimhse sin, cé gur fhan an figiúr maidir le líon na ndaoine a d’úsáid cannabas le mí anuas mar an gcéanna ag 2.6%.

Ó thaobh aoisghrúpaí, bhain na figiúirí ab airde, maidir le leitheadúlacht ar bhonn saoil le haghaidh aon drugaí mídhleathacha, leo siúd idir 25-34 bliana d’aois (34%); agus ina dhiaidh sin daoine 15-24 bliana d’aois (28%) agus  iad siúd idir 35-44 bliana d’aois (27%). 

Tá sé fós amhlaidh go dtuairiscíonn cion níos airde d’fhir ná mná gur úsáid siad aon drugaí mídhleathacha ar bhonn saoil, le bliain anuas agus le mí anuas. Is airde na figiúirí úsáide ó thaobh líon na mban agus na ndaoine fásta breacaosta a thuairiscíonn gur úsáid siad támhacháin, suaimhneasáin agus frithdhúlagráin. 

Dúirt Dr. Corrigan, faoi mar a bhíonn amhlaidh le suirbhéanna eile trasna na hEorpa, nach gcuirtear daoine os cionn 64 bliana d’aois san áireamh ionas go bhfaighfear torthaí ar mó an bhrí a bheidh leo. D’fhás  daoine san aoisghrúpa sin suas  i ré go raibh idir úsáid agus infhaighteacht drugaí mídhleathacha an-teoranta. "Léirigh suirbhéanna ar dhaoine breacaosta rátaí úsáide an-íseal go dtí seo, fiú ar bhonn saoil. Is dóigh go n-athróidh an scéal seo le himeacht ama de réir mar a théann an daonra atá níos óige agus a bhíonn níos nochtaithe do dhrugaí difriúla in aois. Is dócha go rachaidh rátaí leitheadúlachta ar bhonn saoil i méad ar feadh tréimhse maith ama mar sin”, ar seisean.

I gcomhthéacs Eorpach, chuir Dr Corrigan an pointe chun suntais nach n-úsáideann gach tír san AE an cur chuige caighdeánach i leith suirbhéanna ar an daonra, cur chuige a mhol an Lárionad Faireacháin Eorpach um Dhrugaí agus Andúil i nDrugaí (EMCDDA), rud a fhágann go mbíonn sé deacair comparáidí a dhéanamh, ach ina measc siúd a d’úsáid an cur chuige céanna is a d’úsáid an CCND, nach raibh Éire ag an mbarr le haghaidh aon chagatóra drugaí.

Chuir Dr. Corrigan leis sin á rá go bhfuil sé bunriachtanach go leanfar ar aghaidh leis an gcineál suirbhé seo a úsáid ionas go dtabharfar treochtaí faoi deara le himeacht ama. Ní féidir suirbhéanna den sórt sin ar an daonra ginearálta, lena dtugtar sracfhéachaint ar a bhfuil ag tarlú ag an tráth sin i ndáil leis an úsáid drugaí i saol gnáththeaghlach, a dhéanamh ach gach ceithre bliana nó mar sin, le bheith réadúil. Idir an dá linn, dúirt sé go mbeidh an CCND ag moladh go gcuirfear Córas Monatóireachta ar Threochtaí Drugaí i ngníomh mar chuid dá aighneacht don Ghrúpa Stiúrtha don athbhreithniú ar an Straitéis Náisiúnta Drugaí.  

I gcoitinne, bíonn rátaí leitheadúlachta in Éirinn beagánín beag níos ísle ná mar a  bhíonn i dTuaisceart Éirinn don úsáid ar bhonn saoil agus le bliain anuas.

Nótaí don Eagarthóir

Modheolaíocht an tSuirbhé
Comhthionscadal idir CCND agus an tAonad um Thaighde agus Fhaisnéis ar Dhrugaí agus Alcól (ATFDA) i dTuaisceart Éireann is ea an suirbhé ar an daonra ginearálta. Ipsos MORI a thug faoin obair allamuigh in Éirinn thar ceann an CCND agus an tAonad Lárnach Suirbhéanna i dTuaisceart Éireann ATFDA i gcaitheamh na tréimhse céanna ama ó Dheireadh Fómhair 2006 go dtí Bealtaine 2007. Tugtar faisnéis, a bailíodh sa suirbhé roimhe a rinneadh in 2002/3, cothrom le dáta leis an suirbhé seo.
Rinneadh suirbhé ar 6,969 duine san iomlán idir 15-64 bliana d’aois ar oileán na hÉireann (4,967 in Éirinn agus 2,002 i dTuaisceart Éireann) idir mí Dheireadh Fómhair 2006 agus mí  Bhealtaine 2007. Baineadh ráta freagairte 65% amach in Éirinn agus 62% i dTuaisceart Éireann. Agus na sonraí is déanaí ón daonáireamh á n-úsáid, oiriúnaíodh an sampla de réir inscne, aoise agus limistéir iarBhoird Sláinte in Éirinn toisc gurb ionann na limistéir  seo nach mór agus limistéir reatha na dTascfhórsaí Réigiúnacha ar Dhrugaí, chun a ionadaíche is a bheadh sé ar an daonra ginearálta a uasmhéadú. Reáchtáladh an suirbhé de réir na ndianchaighdeán arna leagan síos ag EMCDDA, gníomhaireacht drugaí an AE.
Úsáideadh an mhodheolaíocht chéanna is a úsáideadh in 2002/3 agus ní raibh de dhifear ann ach gur úsáideadh an Allagóireacht Phearsanta Ríomhchuidithe ar an ócáid seo seachas agallaimh le pinn agus páipéar. Tá sé seo níos  éifeachtaí ó thaobh costais de agus fágann sé gur mó mar a bhítear in ann cáilíocht na sonraí a rialú. Ní thuairiscítear ach athruithe atá suntasach ó thaobh staitisticí, ar leibhéal an 5% ar a laghad, i rannóg na gcomparáidí le haghaidh gach dlínse agus tréimhse ama maidir le húsáid (ar bhonn saoil, le bliain anuas agus le mí anuas).

Úsáid Hearóine agus Chnagchócaoin 
Suirbhé ar leitheadúlacht na ndrugaí is ea an suirbhé ar an daonra agus tá sé beartaithe leis an úsáid drugaí sa daonra ginearálta mar aonad iomlán a léiriú. Chun críocha an tsuirbhé seo, glacaimid leis go gciallaíonn an daonra ginearálta na daoine sin idir 15-64 bliana d’aois a chónaíonn i dteaghlaigh in Éirinn agus i dTuaisceart Éireann de ghnáth. Ní bhíonn iad siúd a chónaíonn in institiúidí amhail príosúin, ionaid chúraim chónaithe, tithe altranais, ospidéil srl san áireamh ann. 

D’fhéadfadh sé a bheith amhlaidh nach léirítear an oiread úsáideoirí fadhbacha drugaí agus ba chóir sa chineál seo suirbhé mar gheall ar thréithe casta fadhbacha a saoil.  Úsáidtear modheolaíochtaí eile chun faisnéis a dhéanamh amach ar dhaonraí ceilte na húsáide fadhbaí drugaí amhail iad siúd a úsáideann hearóin agus cnagchócaon. Áirítear na cinn seo a leanas mar shamplaí:

• sholáthair an staidéar gabhála athghabhála ar an bhfadhbúsáid chodlaidíneach a d’fhoilsigh an CCND in 2003 (teideal: Leitheadúlacht na hÚsáide Codlaidíneach in Éirinn 2000-2001 Staidéar Gabhála Athghabhála 3 Fhoinse) meastacháin ar úsáid na hearóine in Éirinn (tá an staidéar seo á dhéanamh an athuair freisin).  
• táscairí maidir leis an éileamh ar chóireáil le haghaidh drugaí amhail an Córas Tuairisceoireachta um Chóireáil Drugaí (arna bhainistiú ag an mBord Taighde Sláinte).

Éire i gComparáid le Tíortha laistigh den AE:
I gcomhthéacs Eorpach, d’fhan rangú na hÉireann ó thaobh na leitheadúlachta drugaí mórán mar an gcéanna ó 2002/2003. Faoi láthair, maidir leis an úsáid ar bhonn saoil (gach duine fásta), tá Éire sa 7ú háit as 19 le haghaidh na húsáide cannabais, sa 4ú háit le haghaidh amfataimíní, sa 4ú háit le haghaidh cócaoin,  agus sa 3ú háit le haghaidh eacstaise agus dé-eitiolaimide aigéid líseirgigh nó LSD araon. 

San áireamh i roinnt de na príomhthorthaí i mBullaitín 1 a bhain leis an oileán ar fad:

• Thuairiscigh 25% de na daoine fásta uile ar oileán na hÉireann (15-64 bliana d’aois) gur úsáid siad aon drugaí mídhleathacha uair amháin ar a laghad riamh ina saol (24% in Éirinn agus 28% i dTuaisceart Éireann); thuairiscigh 8% gur úsáid siad aon drugaí mídhleathacha sa bhliain roimh an suirbhé (7% in Éirinn agus 9% i dTuaisceart Éireann); agus 3% (3% in Éirinn agus 4% i dTuaisceart Éireann) gur úsáid siad aon drugaí mídhleathacha sa mhí roimh an suirbhé.
• Ba é cannabas an druga mídhleathach ba choitianta a úsáideadh agus thuairiscigh 23% de na daoine fásta uile gur úsáid siad uair amháin ar a laghad ina saol é; thuairiscigh 7% gur úsáid siad sa bhliain roimh an suirbhé é agus 3% sa mhí roimh an suirbhé.
• Bhí rátaí maidir le leitheadúlacht ar bhonn saoil le haghaidh drugaí mídhleathacha eile ar oileán na hÉireann cuid mhaith níos ísle ná mar a bhí amhlaidh i gcás cannabais; eacstaise agus beacán draíochta (6% an ceann), cócaon  agus popairí (5% an ceann), amfataimíní agus dé-eitiolaimide aigéid líseirgigh nó LSD (4% an ceann) agus tuaslagóirí (2%). 

LE hAGHAIDH TUILLEADH FAISNÉISE, TÉIGH I dTEAGMHÁIL LE:
Annmarie Brennan, Montague Communications, 01-8303116/086-2605896
Pat Montague, Montague Communications, 01-8303116/087-2549123

Baile | Teagmhálacha | Mapa suímh | Cuardach | Faoin gCCND | Nuacht agus Imeachtaí | Foilseacháin | Gníomhaíochtaí Taighde| Clár Oibre | Maoiniú Taighde | Naisc