Tá tú anseo:   Baile > Nuacht agus Imeachtaí > Preaseisiúintí

Dáta a eisithe: 10.30am, Déardaoin, 23ú Samhain, 2006
Téagmhálaí do na:Gerald Nash (087 2716816)/ Pat Montague (087 2549123)
Meáin Chumarsáide: Montague Communications, teil 01 830 3116

CUIREANN STAIDÉAR CHUN SUNTAIS AN GÁ LE TASCAIRÍ NUA CHUN FADHBANNA ATÁ AG TEACHT CHUN CINN I bPOBAIL MAIDIR LE DRUGAÍ A AITHINT NÍOS LUAITHE

Tá staidéar nua  á sheoladh inniu (Déardaoin, 23ú Samhain) tar éis an gá le tacar nua táscairí a fhobairt chun fadhbanna atá ag teacht chun cinn i bpobail maidir le drugaí a aithint níos luaithe, rud a chuirfeadh ar chumas an Rialtais agus gníomhaireachtaí eile gníomhú go gasta i leith athruithe i dtreochtaí. An Coiste Comhairleach Náisiúnta ar Dhrugaí (CCND) a choimisiúnaigh A Community Drugs Study: Developing Community Indicators for Problem Drug Useagus bhí an Dr Mary Ellen McCann agus Dr Hilda Loughran i gceannas ar an bhfoireann taighde. Bhí sé d'aidhm leis an staidéar scrúdú a dhéanamh ar an mbealach gur athraigh eispéiris thrí phobal ar leithligh, a ndeachaigh an fhadhbúsáid drugaí dóibh - Baile Munna, Bré agus Cromghlinn - ó 1996.

Agus é ag labhairt ag seoladh an Staidéir ar Dhrugaí sa Phobal in Óstán Buswell, dúirt Noel Ahern, T.D., Aire Stáit le freagracht as an Stráitéis Náisiúnta Drugaí, "Soláthraíonn an tuarascáil seo fianaise ar thionchar agus éifeachtacht pholasaithe an Rialtais maidir le drugaí ó 1996. Tá ag éirí le go leor de na tionscnaimh a maoiníodh rud a léirítear le feabhsuithe suntasacha ó thaobh daoine a bheith ag fágáil na scoile go luath, dífhostaíochta agus seirbhísí a sholáthraítear. Bhí laghdú ar roinnt cineálacha coireachta freisin. Tá na buairimh a tharraing pobail anuas faoi na hathruithe atá ag teacht ar phatrúin na mí-úsáide drugaí ar eolas agam chomh maith lena n-iarmhairtí do phobail áitiúla agus is féidir liom a dhearbhú dóibh go bhfuiltear ag tabhairt aghaidhe orthu seo trí na hacmhainní méadaithe atá soláthraithe ag an Rialtas."

Tharraing an Dr Des Corrigan, Cathaoirleach an CCND, aird ar an bpointe go bhfuil roinnt de thorthaí an staidéir ina n-údar díomá. “Cé go bhfuil laghdú tagtha ar thaithí ar an gcoireacht, tá rátaí coireachta áitiúla tosaithe ar a bheith ag fás arís. Tá an úsáid ildrugaí, a chiallaíonn go n-úsáidtear níos mó ná druga amháin ar nós alcóil mar shampla in éineacht le substaintí eile ar nós cannabais nó cóicín, ina húdar buairimh do gach ceann de na pobail a bhí páirteach sa Staidéar seo. Léiríonn torthaí an staidéir an gá go mbeadh níos mó dlúthpháirtíocht ann idir Straitéisí Náisiúnta Alcóil agus Drugaí toisc go raibh an t-ólachán faoi aois ina gcúis le clampar tromchúiseach sna pobail seo,” ar sé. 
 
Is iad torthaí buntábhachtacha an Staidéir ar Dhrugaí sa Phobal ná:

• Thaispeáin gach ceann den trí phobal feabhsuithe ar líon na leanaí faoi bhun 15 bliana a bhí ag fanacht ar scoil agus méadú ar líon na leanaí a chríochnaigh an Ardteistiméireacht.
• Tá méadú tagtha ar dheiseanna fostaíochta i gcaitheamh na ndeich mbliana agus bhí tionchar aige seo ar an ngeilleagar áitiúil agus ar dhearfacht an phobail. Is lú líon na ndaoine atá dífhostaithe. 
• Soláthar méadaithe cóireála drugaí agus seirbhísí tacaíochta foghabhálacha a d'fheabhsaigh a inrochtaine is a bhíonn cóireáil le haghaidh drugaí go háititúil.
• Tá éifeacht mór á imirt ag an mí-úsáid alcóil ar phobail rud a threisíonn an argóint ar son straitéisí alcóil agus drugaí a nascadh lena chéile.
• Tá an úsáid ildrugaí ag baint an bhoinn den mhéid is a d'éirigh le pobail freagairt d'fhadhbanna drugaí rud a dhéanann cás soiléir ar son infheistíochta leanúnaí i roghanna malartacha saor ó dhrugaí agus roghanna athshlánúcháin.
• Ní léirítear tuairiscí áitiúla faoi bhásanna a bhain le drugaí i staidrimh oifigiúla.
• Is dóigh go n-imreoidh an laghdú ar na leibhéil rannpháirtíochta i gcúrsaí pobail tionchar diúltach ar thionscnaimh áitiúla agus ar an toilteanas le réitigh a aimsiú as foinsí laistigh de phobail.
• Tá faitíos ag teacht chun cinn arís chomh maith le baol go n-aireoidh pobail go bhfuil a dtaithí reatha maidir le drugaí iomarcach dóibh.
• Atreisíonn an staidéar an gá le bheith ag leanúint ar aghaidh le hobair le pobail áitiúla i gcomhpháirtíocht chun feabhsuithe fadtéarmacha inbhuanaithe a bhaint amach.

Molann an CCND, mar chéad chéim, go bhforbrófar Táscairí maidir le Drugaí sa Phobal, lena n-aithneofar fadhbanna maidir le drugaí i bpobail, rud a éascóidh le hacmhainní a leithdháileadh níos luaithe chun seirbhísí náisiúnta agus áitiúla a phleanáil agus a sheachadadh.

Dúirt Mairéad Lyons, Stiúrthóir na CCND, “Tá sé criticiúil go bhforbrófar táscairí den sórt sin má táimid chun pobail, a bhfuil fadhb maidir le drugaí ag teacht chun cinn iontu nó ag athrú iontu, a aithint níos luaithe. Cuirfidh seo ar chumas an Rialtais, gníomhaireachtaí agus seirbhísí freagairt d'athruithe i dtreochtaí i bhfad níos gasta. Fágann an bealach a bhailítear sonraí a bhaineann le saincheisteanna ó thaobh drugaí go ginearálta go mbíonn sé fíordheacair ar fad a fháil amach céard go baileach atá ag tarlú ar leibhéal áitiúil laistigh de phobal. Bailítear táscairí reatha maidir le fadhbanna drugaí ar leibhéal náisiúnta nó réigiúnach go ginearálta agus beagán ar leibhéal áitiúil. Moltar sa Staidéar go dtabharfar tacar nua sonraí isteach de Tháscairí maidir le Drugaí sa Phobal a cheanglódh ar ghníomhaireachtaí sonraí a bhailiú agus a stóráil ar leibhéal Toghroinne ionas gur féidir an fhaisnéis ábhartha a mhiondealú de réir an limistéir áitiúil."

Le cois na sonraí atá ann cheana féin ó fhoinsí cóireála agus eisiatachta sóisialta, molann an CCND gur chóir go mbeadh an táscaire maidir le drugaí sa phobal comhdhéanta den fhaisnéis seo a leanas a bheidh ar fáil de réir Toghroinne:

• Coireacht (lena n-áirítear cionta a bhaineann le halcól agus lena sháraítear an t-ord poiblí) agus tuairiscí íospartha
• Neamhláithreacht ar scoil agus treochtaí maidir le daoine a bheith ag fágáil na scoile go luath
• A mhéad is a idirghníomhaíonn nó nach n-idirghníomhaíonn teaghlaigh leis an bpobal
• Leibhhéil saorálaíochais agus rannpháirteachais sa phobal, úsáid saoráidí áitiúla

Cuireadh an tuarascáil i láthair an ghrúpa idir-rannaigh ar dhrugaí a bhfuil an tAire Stáit, Noel Ahern, T.D., ina chathaoirleach air, le déanaí agus tharla cruinniú de phríomhpháirtithe leasmhara le déanaí chun breathnú ar na Táscairí maidir le Drugaí sa Phobal a chur i ngníomh.

CRÍOCH.

Nótaí don Eagarthóir:
Faoin gCCND
Bunaíodh an CCND i mí Iúil 2000 chun comhairle a thabhairt don Rialtas i ndáil le leitheadúlacht, cosc, cóireáil / athshlánúchán agus iarmhairtí na fadhb-úsáide drugaí in Éirinn; bunaithe ar an anailís ar thorthaí taighde agus ar fhaisnéis a bhíonn ar fáil dó. Tá maoirseacht á déanamh ag an gCCND ar an bpróiseas le clár saothair a sheachadadh maidir le fairsinge, tréithe, cúiseanna agus éifeachtaí na húsáide drugaí in Éirinn. Tá an CCND comhdhéanta d’ionadaithe arna n-ainmniú ó ghníomhaireachtaí agus earnálacha ábhartha, idir reachtúil agus neamhreachtúil. Tuairiscíonn an CCND don Aire Stáit atá freagrach as an Straitéis Naisiúnta Drugaí. Tá roinnt mhaith tuarascálacha foilsithe ag an gCCND, atá ar fáil ar an suíomh idirlín. Is féidir tuilleadh faisnéise a fháil ón suíomh idirlín: www.nacd.ie.
Modheolaíocht an Taighde

Baineadh úsáid as taighde rannpháirteach cáilíochtúil i dtrí phobal trasna Bhaile Átha Cliath: Baile Munna, Bré, Cromghlinn. Earcaíodh agus cuireadh oiliúint ar theagmhálacha áitiúla mar thaighdeoirí pobail toisc gur chónaigh agus/nó oibrigh siad sna trí phobal sa taighde. Tugadh saibhreas don taighde trí rannpháirtíocht mheasctha na dtaighdeoirí, a raibh taithí pearsanta ar fhadhbanna drugaí san áireamh ann. Le bailíocht agus déine an taighde a chinntiú, bhí an méid seo a leanas san áireamh sna modhanna lárnacha triantánaithe sonraí: grúpaí fócais; rannpháirtithe buntábhachtacha; taighde ón deisc; litríocht 'liath'; cruinnithe um athbhreithniú; dialanna ó bhéal agus dianagallaimh duine-le-duine. Rinneadh anailís cháilíochtúil ar shonraí le cúnamh na dtaighdeoirí pobail.

Cuireadh Rannpháirtithe an Staidéir i gcatagóirí ceithre ghrúpa: Leibhéal 1 (taithí díreach ar shaincheisteanna maidir leis an úsáid drugaí); Leibhéal 2 (plé neamhdhíreach leis an tsaincheist); Leibheal 3 (rannpháirteachas i ngníomhaíochtaí pobail ach ní maidir le saincheisteanna drugaí); agus Leibhéal 4 (glóir nach gcloistear go minic .i. gan a bheith gníomhach i ngníomhaíochtaí pobail ná maidir le saincheisteanna drugaí). Rinneadh agallaimh duine-le-duine le 20 rannpháirtí arna chomhdhéanamh de bhaill phobail Bhré (u=5), Chromghlinne (u=7) agus Bhaile Munna (u=8). Tugadh faoi naoi ngrúpa fócais le 28 ball de phobal Bhaile Munna, 28 ball de phobal Bhré agus 20 ball de phobal Chromghlinne san iomlán. Na taighdeoirí pobail a d’earcaigh rannpháirtithe chun páirt a ghlacadh sa staidéar - rud a thug glóir dá n-eispéiris sa tionscadal.  

Cás-Staidéir
Bailíodh agus anailísíodh an oiread sonraí gur foilsíodh cás-staidéar maidir le gach ceann de na pobail rannpháirteacha ina dtugtar níos mó mionsonraí faoina n-eispéiris le 10 mbliana anuas.
Le haghaidh tuilleadh faisnéise, téigh i dteagmháil le: Gerald Nash (087 2716816) / Pat Montague (087 2549123) ag Montague Communications, teil. 01 8303116.

Baile | Teagmhálacha | Mapa suímh | Cuardach | Faoin gCCND | Nuacht agus Imeachtaí | Foilseacháin | Gníomhaíochtaí Taighde| Clár Oibre | Maoiniú Taighde | Naisc