Tá tú anseo:   Baile > Nuacht agus Imeachtaí > Preaseisiúintí

Cothaíonn grúpaí pobail taighde nuálach ar shaincheisteanna áitiúla maidir le drugaí

Dé Luain 4ú Deireadh Fómhair 2004

Sheol an tUas. Noel Ahern, T.D., Aire Stáit don Straitéis Náisiúnta Drugaí, ceithre thuairisc ar thaighde pobail arna maoiniú faoin Scéim Thaighde don Earnáil Phobail/Dheonach de chuid an Choiste Chomhairligh Náisiúnta ar Dhrugaí (CCND) inniu [Dé Luain 4.10.04] ag comhdháil faoi ‘Saincheisteanna maidir le Drugaí á bhFiosrú trí Thaighde Pobail’. Pléifidh beagnach 200 duine ón earnáil phobail agus dheonach timpeall na tíre torthaí agus moltaí buntábhtachtacha a cuireadh chun tosaigh sna tuairiscí i ndáil le saincheisteanna áitiúla maidir le druga í.

Is iad an ceithre thionscadal taighde a bhí maoinithe ag an scéim ná Tionscadal Aicsin Óige Bhaile Mhunna (TAÓBM), Clár Phobal Chósta Chill Bharróg (CPCCB), Cé na gCeannaithe Éireann (CCÉ) agus Aonad Comhairle Thamhlachta do Dhaoine gan Dídean (ACTDD).
Agus an chomhdháil á hoscailt inniu aige, ghabh an tAire comhghairdeas leis na tionscadail as ucht éacht na dtuairiscí taighde luachmhara a tháirg siad. “Cuirfear na saincheisteanna san áireamh agus an t-athbhreithniú lárthéarma á dhéanamh ar an Straitéis Náisiúnta Drugaí faoi láthair” arsa an tAire.

Dúirt Dr Des Corrigan, Cathaoirleach, CCND,

"Bhí sé i gceist againn go gcothódh an scéim dheontas taighde taighde nuálach pobalbhunaithe ar dhrugaí agus go líonfadh sé bearnaí sa mhéid atá ar eolas againn agus go gcabhródh sé le polasaithe poiblí a fhorbairt. Sárshampla is ea an ceithre thuairisc seo den mhéid is féidir a bhaint amach trí thaighde pobalbhunaithe a mhaoiniú. Is mian liom aitheantas a thabhairt do thacaíocht na Roinne Gnóthaí Pobail, Tuaithe agus Gaeltachta as an maoiniú don scéim dheontais seo a éascú. "

Seachas saincheisteanna ilchineálacha a scrúdú, téama coitianta atá ag teacht chun cinn trasna na dtuairiscí ar fad ná go bhfuil breisiú leanúnach ar sheirbhísí agus tiomantas don oideachas ríthábhachtach ar leibhéal áitiúil. Soláthraíonn torthaí na dtuairiscí taighde seo an t-eolas agus an fhaisnéis atá riachtanach chuige seo. Scrúdaíonn an ceithre thionscadal taighde na saincheisteanna seo a leanas:

• Tionscadal Aicsin Óige Bhaile Mhunna (TAÓBM)
  Déantar staidéar leis an tuairisc seo ar ról na mbeinseadé-asaipíní agus fadhbanna maidir le mí-úsáid substaintí ag teacht chun cinn i mBaile Munna. Fiosraíonn an tuairisc na dinimicí maidir le soláthar agus éileamh i gcomhthéacs áitiúil freisin, agus cuirtear chun suntais ann na fachtóirí a fhágann go leanann leibhéal réasúnta ard ó thaobh úsáid bheinseadé-asaipíní ar aghaidh laistigh den phobal. Déantar sraith mholtaí sa tuairisc lena n-áirítear straitéisí a d’fhéadfadh athrú a éascú. Go príomha, leagtar béim sa tuairisc ar an ngá infheistíocht a dhéanamh le seirbhísí a fhorbairt chun dul in éineacht le liachleachtóirí agus tacaí nach tacaí cógaisíochta iad a fhorbairt le haghaidh an díthocsainiúcháin ó bheinseadé-asaipíní chomh maith le roghanna malartacha ar theiripe bheinseadé-asaipíní.
  
• Clár Phobal Chósta Chill Bharróg (CPCCB)
  Déantar amach leis an staidéar seo na pátrúin agus treochtaí maidir le mí-úsáid drugaí i limistéar Chill Bharróg ag daoine óga idir 10-17 mbliana d’aois agus scrúdaíonn sé a ndearcaí i leith na húsáide drugaí, agus na fachtóirí riosca a théann le hiad a úsáid. Déantar measúnú leis an staidéar ar an úsáid drugaí i measc sampla daoine a d’fhág an scoil go luath freisin agus scrúdaíonn sé dearcaí daoine sa phobal maidir leis an scéal ó thaobh drugaí sa limistéar. Limistéar é a bhfuil meascán cúlraí sóisialta ann agus tá an taighde tábhachtach ó thaobh comharthaí a thabhairt maidir le húsáid drugaí agus dearcaí daoine óga i leith drugaí i bpobail na mbruachbhailte cosúil leis timpeall na tíre. Déantar sraith mholtaí sa tuairisc lena n-áirítear scrúdú a dhéanamh ar a indéanta is a bheadh Tionscadal Píolótach i gCill Bharróg lena dtabharfaí scoileanna, eagraíochtaí spóirt, grúpaí pobail agus deonacha le chéile i gcomhpháirtíocht leis na gníomhaireachtaí reachtúla, go háirithe an bord sláinte chun dul i ngleic leis an úsáid drugaí ag daoine óga. Táthar ag moladh go leanfar ar aghaidh le cur chuigeanna éifeachtacha a fhorbairt agus a chur i ngníomh freisin i leith oideachais ar dhrugaí.
  
• Cé na gCeannaithe Éireann (CCÉ)
  Scrúdaíonn an staidéar taiscéalach seo na pátrúin maidir le húsáid drugaí i measc pobal nua; fiosraíonn sé na cúiseanna agus na spreagthaí le húsáid a bhaint as drugaí; déanann sé amach na rioscaí a d’fhéadfadh na húsáideoirí a bheith ag tarraingt orthu féin; scrúdaíonn sé leibhéal an fheasachta ar straitéisí chun sláinte a chur chun cinn/ díobháil a laghdú agus ar sheirbhísí cóireála drugaí; agus aithníonn sé bacainní atá rompu ó thaobh a bheith ag teacht ar sheirbhísí. Tá sraith mholtaí sa tuairisc chun cabhrú le seirbhísí drugaí freagairt do riachtanais úsáideoirí drugaí ó phobail nua. Go háirithe, moltar sa Tuairisc an gá le seirbhísí a sholáthar a bheidh inrochtana agus oiriúnach ó thaobh cúltur.
  
• Aonad Comhairle Thamhlachta do Dhaoine gan Dídean (ACTDD)
  Scrúdaíonn an taighde seo na nascanna idir a bheith gan dídean agus úsáid drugaí agus cineál na húsáide drugaí i measc an daonra gan dídean i dTamhlacht. Fiosraíonn sé freisin na cúiseanna go bhfuil siad gan dídean; scrúdaíonn sé polasaithe agus cleachtais na n-údarás áitiúil i ndáil le húsáideoirí drugaí gan dídean a chur i dtithe; agus fiosraíonn sé taithí úsáideoirí drugaí gan dídean agus tagairt ar leith á déanamh do pholasaithe agus chleachtais na seirbhísí um easpa dídine. Rud bunúsach i measc na moltaí a rinneadh leis an taighde ná an gá leis na nascanna idir a bheith gan dídean agus úsáid drugaí a aithint ar leibhéil pholasaithe agus maidir le seirbhísí a sheachadtar.
  

Tar éis don scéim a bheith seolta in 2001, fuair an CCND breis is 100 fiosrúchán agus 35 iarratas as chuile chearn den tír. Forbraíodh an scéim agus meicníochtaí monatóireachta agus tacaíochta ina gcuid di ag gach céim ón mbuniarratas go dtí go gcuirtear na staidéir thaighde i gcrích, lena chinntiú go ndearnadh an taighde de réir na gcaighdeán modheola íochta ab airde.

Críoch

Tuairiscí na hEarnála Pobail / Deonaí

• Tionscadal Aicsin Óige Bhaile Mhunna Beinseadé-asaipíní – cén duine a bhfuil sé ina chúntóir beag aige? Ról na mBeinseadé-asaipíní agus fadhbanna maidir le mí-úsáid substaintí ag teacht chun cinn i mBaile Munna
• Clár Phobal Chósta Chill Bharróg: Staidéar ar leitheadúlacht na húsáide drugaí ag daoine óga i gceantar bruachbhailteach measctha.
• Cé na gCeannaithe Éireann: Úsáid Drugaí i measc pobal nua in Éirinn. Staidéar taiscéalach.
• Aonad Comhairle Thamhlachta do Dhaoine gan Dídean: Hearóin – an díon meabhrach os cionn do chloiginn. Nascanna idir a bheith gan dídean agus úsáid drugaí.

Le haghaidh tuilleadh faisnéise:

Jane O’Dwyer (086 6491408) / Pat Montague (087 2549123) ag Montague Communications, Teil. 01 8377960

Baile | Teagmhálacha | Mapa suímh | Cuardach | Faoin gCCND | Nuacht agus Imeachtaí | Foilseacháin | Gníomhaíochtaí Taighde| Clár Oibre | Maoiniú Taighde | Naisc